Wedi gadael rhwng 1 Ebrill 2008 a 31 Mawrth 2014

Oedran ymddeol arferol y cynllun yw 65 , ond gallwch ddewis derbyn eich buddion CPLlL ar unrhyw adeg o 55 oed. Fodd bynnag, caiff eich pensiwn ei leihau ar gyfer taliad cynnar – gweler Ffactorau Ymddeol yn Gynnar (PDF) , wedi’i gyfrifo gan Adran Actiwari’r Llywodraeth (GAD).

Os gadawsoch y cynllun â buddion gohiriedig ar neu ar ôl 1 Ebrill 2008, mae’n bosib y gallech dderbyn eich buddion CPLlL yn wirfoddol o oedran mor gynnar â 55.

Os gadawsoch y Cynllun Pensiwn Llywodraeth Leol (CPLlL) ar neu rhwng 1 Ebrill 2008 a 31 Mawrth 2014, bydd eich buddion gohiriedig wedi cael eu cyfrifo trwy ddefnyddio eich tâl pensiynadwy cyfwerth amser cyfan ar y dyddiad y penderfynoch beidio ag ymuno neu’r dyddiad y gadawsoch, a’ch aelodaeth o’r cynllun hyd hynny.

Eich Aelodaeth o’r Cynllun
Caiff hyd eich aelodaeth gyfan ei fesur mewn blynyddoedd a diwrnodau ac mae’n cynnwys hyd yr amser rydych wedi bod yn aelod o’r CPLlL, yn ogystal ag unrhyw aelodaeth a ddyrannwyd i drosglwyddo hawliau pensiwn blaenorol i’r cynllun.

Os oeddech yn gweithio’n rhan-amser yn ystod y cyfnodau hyn, mae’n debyg mai pro rata oedd eich aelodaeth gyfan er mwyn cymryd eich oriau rhan-amser i ystyriaeth.

Eich Tâl Terfynol
Hwn yw swm y tâl pensiynadwy yr ydych wedi’i dderbyn yn ystod blwyddyn olaf eich cyflogaeth h.y. 365 diwrnod yn ôl o’ch diwrnod gadael. Fodd bynnag, gallai fod yn seiliedig ar y ddwy flynedd flaenorol, os yw’n uwch.

Os ydych yn gweithio’n rhan-amser, caiff eich tâl terfynol ei gyfrif fel cyfwerth amser cyfan.

NI FYDD unrhyw oramser heb gontract a weithiwyd gennych yn cael ei gynnwys wrth gyfrifo eich tâl terfynol.

Cyfrifo eich Buddion Gohiriedig
Yn achos aelodaeth o 1 Ebrill tan 31 Mawrth 2014, caiff buddion eu cyfrifo trwy ddefnyddio rhannau o 60, ond HEB hawl i gyfandaliad awtomatig.
Aelodaeth ÷ 60 x Tâl Terfynol = Pensiwn Blynyddol

Cyfanswm cyfunol eich pensiwn rhannau 60 a 80 fydd cyfanswm eich pensiwn blynyddol CPLlL, a hefyd byddwch yn derbyn cyfandaliad awtomatig ar gyfer eich cyfnod aelodaeth cyn 31 Mawrth 2008.

Fodd bynnag, byddwch hefyd yn cael yr opsiwn pan fyddwch yn ymddeol o ildio peth o’ch pensiwn i gynyddu eich cyfandaliad awtomatig neu ennill peth arian di-dreth os dechreuoch yn y cynllun ar neu ar ôl 1 Ebrill 2008.

Mae eich buddion gohiriedig yn gysylltiedig â’r mynegai, felly bydd eich gwerth yn cynyddu bob mis Ebrill yn unol â’r Mynegai Prisiau Defnyddwyr (MPD) .

Ar ôl i chi ymddeol, byddwch yn cael yr opsiwn i ildio peth o’ch pensiwn er mwyn cael cyfandaliad di-dreth – a elwir yn Gyfnewidiad.  Am bob £1 o’ch pensiwn rydych yn ei ildio, byddwch yn derbyn £12 o gyfandaliad (hyd at 25% o werth cyfalaf eich buddion ac yn ogystal ag unrhyw hawl cyfandaliad awtomatig a allai fod gennych o ran eich aelodaeth hyd at ac yn cynnwys 31 Mawrth 2008).

Pan fyddwch yn dweud wrthym eich bod yn ystyried ymddeol, byddwn yn anfon eich manylion ymddeol atoch a fydd yn cynnwys ffigurau ar gyfer eich gwerthoedd pensiwn sylfaenol ac uchafswm y symiau cyfandaliad ychwanegol y gallwch eu cymryd.  Byddwn hefyd yn anfon manylion atoch ynglŷn â sut i gyfnewid eich pensiwn am gyfandaliad.

Os ydych erioed wedi cyfrannu at drefniad AVC mewnol, gallech ystyried defnyddio’r gronfa hon i hybu eich buddion CPLlL.  NI fydd unrhyw ostyngiad i’ch pensiwn blynyddol er mwyn rhoi cyfandaliad di-dreth yn lleihau unrhyw fuddion goroeswr dilynol a allai fod yn daladwy ar ôl i chi farw.